Domingo Barreiros: Música humilde con alma

 

Esclavina - 2022

Domingo Barreiros: Música humilde con alma

O 14 de maio de 2022, durante o reencontro anual dos alumnos de Herbón celebrado en Ponferrada, Domingo Barreiros  foi honrado coa "esclavina de prata", un recoñecemento á súa entrega desinteresada en beneficio da asociación ASAFA.

Domingo Barreiros Lago (Louro-Muros, 1942) foi alumno do Seminario de Herbón, onde cursou o Bacharelato. Abandonou esta institución en 1960 para continuar por libre a carreira de Maxisterio en Santiago, acadando posteriormente a licenciatura en Filoloxía. 

En 1963 gañou a praza de docente e exerceu en Outes, Noia, Carnota e Sobrado dos Montes. Durante anos, foi mestre propietario dunha escola de nenos no Freixo (Outes) e noutros colexios da contorna, labor que compaxinou coa súa faceta de músico.

Como músico, foi membro da Orquestra Los Romero e director de diversas corais, como o Orfeón Ría de Muros, a Coral "Agustín González" de Louro, o Club de Xubilados de Porto do Son, o Liceo de Noia, a Coral "Francisco Añón" de Outes, a Coral "Don Diego de Muros", a Coral "San Xoán de Serres" e a Coral Xuvenil "Solpor de O Freixo", ademais de colaborar puntualmente coa Schola Cantorum Herbonense, formada por antigos alumnos do Seminario.

A súa formación musical iniciouse en Herbón e continuou no Conservatorio de Santiago, influenciado polo seu paisano Manuel Ángel Viro Caamaño e por Manuel Feijóo Souza, fundador do Orfeón "Terra a Nosa". 

Sesión do Concello de Outes de nomeamento de Fillo Predilecto

Ademais de dirixir corais, Domingo Barreiros destacou pola súa contribución á composición, especialmente no ámbito da música galega, poñendo en valor a obra cultural e poética de autores en lingua galega.

Entre os recoñecementos que recibiu, destaca a Medalla da Vila de Muros en outubro de 2002, pola súa contribución á promoción e difusión da música coral na comarca. Aínda que el, na súa modestia, se declarou non merecedor de tal distinción, o recoñecemento foi ben merecido.

En maio deste ano 2024, en Outes, foi nomeado Fillo Predilecto nun acto que destacou a súa pegada humana, social e solidaria, sementando paixón e coñecementos musicais alí por onde pasou.